Rastet me koronavirus në Rusi arrijnë në 10,000

Rusia gjatë ditës së sotme ka raportuar një rritje rekord të rasteve me koronavirus duke e çuar numrin zyrtar të të prekurve në 10,000 – një ditë pasi presidenti Vladimir Putin tha se javët e ardhshme janë vendimtare në luftën me virusin. Numri i të prekurve me Covid-19 në Rusi u rrit për 1459, derisa janë regjistruar edhe 13 vdekje të tjera që e çon numrin e vdekjeve në 76. Moska - që është vendi më i goditur - dhe shumë rajone të tjera janë në javën e dytë të bllokimit të pjesshëm. Banorëve u është thënë që të qëndrojnë në shtëpitë e tyre dhe të dalin vetëm për të shkuar në dyqane për furnizim me ushqime dhe barnatore, transmeton Klan Kosova. Rusia kishte regjistruar shumë më pak raste me koronavirus sesa shumë shtete të Europës Perëndimore në fazat e hershme të shpërthimit. Por, numri i rasteve filloi të rritet ndjeshëm në këtë muaj dhe tani virusi ka shpërthyer edhe jashtë Moskës - që është epiqendra. Zyrtarët rusë deri në fund të muajit të kaluar kanë deklaruar se situata është nën kontrollë dhe nuk ka një epidemi. Diskursi i tyre ndryshoi pasi kryetari i Moskës Sergei Sobyanin – i cili ka marrë një rol kyç në këtë krizë – hodhi dyshime mbi vërtetësinë e shifrave zyrtare duke thënë se situata reale mund të jetë shumë më keq sesa mund të duket.