Lajmet e fundit
Drejtori i përgjithshëm i Policisë së Kosovës, Rashit Qalaj ka mbajtur një takim zyrtar me stafin menaxherial të policisë duke përfshirë drejtorët e departamenteve, divizioneve si dhe drejtorët rajonalë.
Në këtë takim Qalaj ka kërkuar nga menaxhmenti policor realizimin e objektivave strategjike të cilat dalin nga Plani Zhvillimor Strategjik i Policisë së Kosovës, menaxhimin sa më efikas policor si dhe ngritjen e performancës dhe integritetit policor, njofton policia, përcjell Klan Kosova.
“U diskutuan edhe çështjet kyçe që kanë të bëjnë me sigurinë e qytetarit, bashkëpunimin dhe takimet me komunitetin, luftën kundër korrupsionit, sigurinë në trafik, parandalimin e veprave kriminale si vjedhjet, grabitjet, drogat etj, duke kërkuar që të punohet dhe angazhohen edhe më shumë që të krijohet një klimë edhe më e qetë dhe më e sigurt për të gjithë qytetarët, e që kontribuon edhe në sigurinë e përgjithshme të vendit”, thuhet në kumtesë.
“Drejtori Qalaj, theksoi se përmes vlerësimit të performancës së zyrtarëve policorë, përmes menaxhimit sa më efikas të burimeve njerëzore dhe atyre logjistike, mund të arrihen rezultate edhe më pozitive në shumë sfera policore”.
