Rama tejet falënderues ndaj Valievit - ai shkroi histori duke sjell medaljen e parë olimpike në Shqipëri

Kryeministri i Shqipërisë, Edi Rama është shprehur falënderues ndaj Chermen Valiev, i cili ia fitoi vendit medaljen e parë olimpike. Rama përmes një postimi në Facebook, u shpreh se Shqipërisë jo vetëm që nuk i ikin më talentet sportive, po talente të lindura gjetkë e zgjedhin si atdheun e dytë për t’u stërvitur në kushte optimale e për t’u ngjitur në majat e botës, përcjell Klankosova.tv. “Medalja e Parë Olimpike në historinë tonë është një lajm që flet shumë për punën e Komitetit të Rilindur Olimpik Shqiptar nën drejtimin e Fidel Yllit; për të vërtetën që Shqipërisë jo nuk i ikin më talentet sportive të lindura këtu, po talente të lindura gjetkë e zgjedhin si atdheun e dytë për t’u stërvitur në kushte optimale e për t’u ngjitur në majat e botës; si edhe për fillimin e një historie të re, që në vite do të sjellë fryte të tjera të gëzueshme falë lëvizjes masive sportive për fëmijët dhe investimeve masive në palestra e në infrastrukturë sportive që do të vazhdojnë. Faleminderit Kampion”, shkruan kryeministri shqiptar. Shqipëria asnjëherë më parë përgjatë historisë së saj në Lojrat Olimpike nuk kishte fituar ndonjë medalje, por tani, me ditën e sotme të 10 gushtit, historia po rishkruhet.