Rama: Do e bëjmë shtetin që e meritojnë shqiptarët

Partia Socialiste dhe Lëvizja Socialiste për Integrim janë dy parti, por një fuqi e vetme udhëheqëse që ka vizionin dhe programin dhe vullnetin e hekurt për ta çuar Shqipërinë në drejtimin e duhur

Kështu deklaroi kreu i qeverisë shqiptare, Edi Rama i cili mori pjesë sot në mitingun elektoral në qytetin e Sarandës në mbështetje të kandidates së koalicionit të majtë për bashkinë e qytetit, Floriana Koka.

Rama theksoi se këto zgjedhje janë një provë e vullnetit për të cilin Shqipëria dha besimin e madh në 23 qershorin e 2013-s, dhe janë prova për ta kthyer Shqipërinë në drejtimin e duhur.

"Në nuk kemi ardhur këtu për t’ju treguar mrekullira apo për t’u krenuar. E di qe kemi shumë më tepër për të bërë. Por kam bindjen e sinqertë se për çdo njeri të arsyeshëm është e qartë se në 18 muajt e bilancit të parë ju kemi dhënë provën se jemi dhe e kemi kthyer Shqipërinë në drejtimin e duhur." deklaroi Edi Rama, transmeton Shekulli.al