Rahoveci fiton kryendeshjen në Pejë, pikët e para për Trepçën

Të shtunën janë luajtur dy ndeshjet e para të stinorit pranveror në Superligën e Kosovës në hendboll në konkurrencë të meshkujve. Në kuadër të  xhiros së 15-të, në palestrën “Karagaçi” në Pejë u zhvillua kryendeshja mes Besa Famgasit dhe Rahovecit. Me rezultat 37:30, ku fitore shënoi Rahoveci, transmeton Klankosova.tv Për Rahovecin është fitorja e 15-të me radhe dhe tani udhëheqë në tabelë me 30 pikë. Besa mbetet e dyta me 22 pikë. “Vreshtarët” thuajse nga fillimi i ndeshjes mbajtën epërsi prej disa golash. Në fund dallimi ishte shtatë gola. Egzon Gjuka i realizoi 11 gola për Rahovecin. Shtatë i kishte Antonio Vozila, kurse pesë i realizoi Jeton Bislimi. Olsi Mulaj i kishte tetë gola për Besën. Balsha Çejoviq i shënoi gjashtë, ndërsa pesë i kishte Amar Muqolli. Ndërkohë Trepça i ka fituar pikët e para këtë edicion. Në “Minatori” e mposhti Vushtrrinë me rezultat 31:26. Sali Maxhera ishte më efikasi te mitrovicasit me tetë gola. Shtatë i kishte Luigj Kolaj, ndërsa nga pesë i shënuan Ermir Smaka e Ardi Halili. 14 gola për vushtrriasit i shënoi Erkan Abazxhiku. Pesë i kishte Egzon Ademi. Trepça i ka dy pikë në pozitën e fundit. Vushtrria është e pesta me tetë pikë. Të dielën zhvillohet ndeshja Llapi – Prishtina, njofton Federata e Hendbollit të Kosovës.