Rafuna: Po bëhemi vend i pashpresë

Rritja e çmimit të energjisë elektrike po rrezikon bizneset dhe standardin jetësor të qytetarëve. Kështu po vlerëson kryetari i Odës Ekonomike të Kosovës, Lulzim Rafuna. Rafuna deklaroi se Kosova po bëhet vend i pashpresë. Sipas tij, rritja prej 16.1 për qind e çmimit të rrymës po ndikon negativisht në fuqinë blerëse, ndërsa dalja në tregun e lirë e ka rritur çmimin e energjisë deri në 400 për qind, duke shtuar se kjo situatë mund të çojë në mbylljen e bizneseve, në rritje të papunësisë dhe varfërim të mëtejshëm të qytetarëve. “Shtrenjtimi 6.1 për qind është shumë. Po ashtu, është shumë edhe dalja në tregun e lirë, ku prej 200 – 400 për qind ka shkuar, por nëse vazhdon kjo kokëfortësi që bizneset të mbahen në tregun e lirë, nuk do të flitet më për 400 për qind, por nuk do të ketë përqindje që do ta ndalë çmimin e energjisë elektrike. Ne importojmë energjinë. Bashkë me të, e importojmë edhe çmimin. Biznesi jo që do të mbyllet, por nuk do të mund të ekzistojë më në këto kushte dhe rrethana.Për këtë arsye rritja prej 16.1 për qind për qytetarët e Kosovës nuk ka qenë rritje e drejtë, sepse e ka varfëruar dhe ia ka ulur standardin jetësor. Biznesi atakohet, sepse nuk ka fuqi blerëse. Kur nuk ka biznesi nuk mund të performojë. Për këtë arsye ne jemi kundër rritjes së çmimit të energjisë elektrike, qoftë për ekonominë familjare, qoftë për biznese”, tha Rafuna për EO transmeton Klankosova.tv. Ai paralajmëron se pasojat më të rënda do të ndihen në muajt e ftohtë, kur konsumi i energjisë rritet ndjeshëm. Kreu i OEK-ut, shtoi se prodhuesit vendor po humbasin konkurrencën përballë produkteve të importuara, ndërsa eksporti vazhdon të bie. “Nëse mbyllen bizneset rritet papunësia, Kosova po bëhet një vend i pashpresë. Qytetarët nuk e vërejnë tani për arsye se nuk shpenzojmë shumë. Më së shumti çmimi do të vërehet nga fillimi i muajit tetor, kur moti të jetë më i ftohtë dhe të fillojë konsumimi i energjisë. Atëherë do të vërejë qytetari, por edhe bizneset. Po bëhemi një vend që do të do të na shfrytëzojnë të gjithë, të gjithë do të na shesin, ne nuk do të kemi prodhim. Janë të dhënat e fundit: vetëm 13 për qind e mbulojmë eksportin me import. Ne kemi ngecur, bile kemi rënie të eksportit. Në pesëmujor janë 1.6 miliardë që janë importuar.Të rritet çmimi i energjisë elektrike është kosto operative e çdo prodhuesi dhe do të jetë më i shtrenjtë produkti. Nuk do të jetë konkurrues me produktin e importuar dhe shtetet tjera nuk do të kenë interes për prodhuesit e vendit”, tha kryetari i Odës Ekonomike Lulzim Rafuna transmeton Klankosova.tv.