"Qoftë i përhershëm kujtimi për të", Sindikata e Policisë ngushëllon familjen e Shaban Hajdarit

Vdekja e zyrtarit policor të Njësisë së Reagimit të Shpejtë, Shaban Hajdari, ka tronditur familjen, kolegët dhe komunitetin policor.

Hajdari është gjetur pa shenja jete në varrezat e fshatit Morinë të Kukësit. Sipas dyshimeve fillestare, ai dyshohet se ka kryer vetëvrasje me armë zjarri, raporton Klankosova.tv. Pas kësaj ngjarjeje, Sindikata e Policisë së Kosovës ka shprehur ngushëllimet më të sinqerta për familjen e të ndjerit, duke vlerësuar kontributin e tij në shërbim të Policisë së Kosovës. Në telegramin e ngushëllimit, Sindikata ka shprehur dhimbjen për humbjen e zyrtarit policor dhe është solidarizuar me familjarët, kolegët dhe të afërmit e tij.

“Shprehim ngushëllimet tona më të sinqerta për ndarjen nga jeta të zyrtarit policor Shaban Hajdari. Shprehim solidaritetin dhe mbështetjen tonë për familjen, kolegët dhe të afërmit e të ndjerit, duke u uruar forcë dhe kurajë për ta përballuar këtë humbje”.

Në fund të mesazhit, Sindikata ka nderuar kujtimin e Hajdarit me fjalët: “Qoftë i përhershëm kujtimi për të.” https://klankosova.tv/humbem-nje-polic-te-perkushtuar-shoku-i-shkolles-me-dedikim-prekes-per-shaban-hajdarin/