“Qeveria mos të përzihet në punët e gjyqësorit”

Deklarimet e Kryeministrit të Kosovës, Isa Mustafa, për rastin “Stenta” në mbledhjen e djeshme të Qeverisë së Kosovës, janë parë nga Prokurori i Shtetit si tendenca për ndikim në procedurat gjyqësore, njofton Klan Kosova. Në një njoftim të Prokurorit të Shtetit për këtë rast thuhet se “konsiderojmë që prononcimi i Institucioneve Ekzekutive lidhur më ecurinë e hetimeve dhe tendenca për të ndikuar në procedurë përmes kërkesës që rasti të mbyllet sa më shpejt, nuk është në përputhje më pavarësinë dhe paanshmërinë e sistemit gjyqësor si pushtet i ndarë nga pushteti ekzekutiv”. Mustafa dje ka komentuar rreth këtij rasti duke thënë se është mirë që organet e rendit ta kryejnë punën e tyre dhe rasti të përfundohet, ndërsa ka shtuar se Qeveria beson në shumicën dërrmuese të mjekëve. Ndryshe, në një artikull të së premtes të gazetës Zëri janë publikuar rreth 100 emra të mjekëve në Kosovë që janë duke e hetuar nga Prokuroria në rastin e njohur si “Stenta”. Mjekët dyqshohet se janë përfshirë në dhënie të ryshfetit me qëllim që në spitalet e tyre të referohen pacientë nga sektori publik për të kryer procedura të koronarografisë dhe stentimit, njofton Klan Kosova.

klankosova.tv