Promovohen tri gjykimet e Adem Demaçit

Në kuadër të shënimit të 80 vjetortit të lindjes së veprimtarit të çështjes kombëtare, Adem Demaçit, në Institutin Albanologjik të Kosovës është përuruar  trilogjia kushtuar veprës së tij të autorit Selatin Novosella, njofton Klan Kosova. Ministri i arsimit, Arsim Bajrami, dikasteri i të cilit financoi botimin e librave me titujt " Adem Demaçi në gjykimin e parë  - 1958", "Adem Demaçi në gjykimin e dytë - 1964" dhe "Adem Demaçi në gjykimin e tretë - 1975" , tha se ndjehet krenar që ky vit po i kushtohet një veprimtari të  madh si Adem Demaçi. Bajrami shtoi se Demaçi mbajti gjallë  kauzën e Kosovës për liri duke u bërë  shembull se si nuk duhet të gjunjëzohet intelektuali. Ndërsa për librat mbi tri gjykimet e tij ministri  i arsimit deklaroi tha se do ta mbajnë gjallë kontributin e veprimtarit të çështjes kombëtare. Fjalë të mëdha për Demaçin pati edhe ambasadori  i Shqiperise në Prishtinë, Qemajl Minxhozi, i cili tha se ai përfaqëson mençurinë mbarëshqiptare. Në vitin e Demaçit, ambasadori shqiptar paralajmëroi shtrirje të aktiviteteve edhe në Shqipëri. Në këtë ceremoni nuk ishte i pranishëm Adem Demaçi, por bashkëshortja e tij, njofton Klan Kosova.