Prizren: Arrestohet në flagrancë “fajdexhiu”, borxhi i viktimës kishte arritur në mbi 81 mijë euro

Është arrestuar në flagrancë një person në Prizren, nën dyshimin se po pranonte para në emër të fajdes. Në komunikatën e Prokurorisë Themelore në Prizren, thuhet se viktima fillimisht i kishte pasur borxh në shumën prej 70 mijë eurosh. “I pandehuri i arrestuar, nga muaji Shtator i vitit 2023 dhe në vazhdimësi, deri në datën e arrestimit, duke shfrytëzuar gjendjen e rëndë financiare të personit të dëmtuar, varfërinë dhe papërvojën e tij, në atë mënyrë që pasi i dëmtuari – viktima, A.Z., nuk kishte pasur mundësi t’ia kthejë një borxh në shumën prej 70,000.00 €, të cilin borxh i detyrohej të pandehurit F.Sh., pasi që ky i fundit gjatë muajit Janar të vitit 2024, përmes një programi elektronik të lojërave të fatit, i kishte mundësuar të dëmtuarit të luaj bixhoz të paligjshëm, ashtu që në momentin kur viktima kishte hasur në vështirësi që t’ia paguajë borxhin, i pandehuri arrin ta bindë viktimën që në emrin e tij do të angazhohet dhe t’ia sigurojë paratë, në mënyrë që t’ia krijojë kushtet të njëjtit për kthimin e borxhit”. Në njoftim tutje bëhet e ditur se nga rritja e kamatës borxhi kishte arritur në vlerën e 81 mijë e 400 eurosh. “Në këtë rast i pandehuri i arrestuar, i ofon viktimës para me fajde – me kamata të paligjshme fillimisht prej 15% pastaj 20% e deri në 25%, kështu duke i shkaktuar viktimës dëm të konsiderushëm pasuror, i cili nuk kishte arritur t’ia paguajë shumën e mbetur të kamatës, gjegjësisht totalin e kamatës nga të gjitha huazimet e të “hollave me fajde, që nga periudha e muajit Shtator të vitit 2023, e cila kap vlerën e përgjithshme prej 81,400.00 €”. I pandehuri i arrestuar, gjendet nën masën e ndalimit 48 orësh, ndërsa prokuroria thotë se ka parashtruar kërkesë për caktim të masës së paraburgimit, ndërsa akuzohet se ka kryer veprat penale “Organizimi i skemave piramidale dhe bixhozit të paligjshëm” nga neni 294, dhe “Fajdeja” nga neni 331, sipas Kodit Penal të Republikës së Kosovës