Presidenti serb ndërton kishë për vete

Presidenti aktual i Serbisë, Tomislav Nikoliq, është duke ndërtuar një kishë, në të cilën ai ka shfaqur dëshirë të varroset kur të vdes. Objekti i ri fetar, po bëhet në Bajçetinë të Shumadisë, prej nga vjen edhe ish-radikali. Ky veprim i tillë është parë si ide e pa stil dhe si përpjekje e kryetarit për t'u mbajtur mend si njeri i popullit dhe  respektues i traditës, apo edhe si shenjtor, raporton "Kurir", transmeton Klan Kosova. "Kjo është dicka alla Tomislav Nikoliq dhe imazhit të tij si njeri popullor nga Shumadia", ka thënë Branko Radun, analist politik. "Ky është një akt simbolik me porosi të qartë - është njeri i popullit, që respekton traditën dhe që dëshiron të kujtohet ngjashëm me udhëheqësit e sundimtarët serbë të kohëve e shekujve të kaluar". Megjithatë, ndërtimi i kishës dhe kriptës - vendvarrimit të tij, brenda saj, po shihet si e keqja më e vogël në aspektin financiar, duke patur paraqysh që tjerët shpenzojnë para të majme për gjëra tjera. Objekti fetar ka kushtuar rreth 500 mijë euro, prejardhja e të cilave, sipas gazetës, nuk është sqaruar asnjëherë. 150 mijë janë dhënë për kishën dhe 350 mijë tjera për afreskat brenda saj. Janë disa sundimtarë serbë që janë varrosur në kisha. Eshtrat e despotit Stefan Lazareviq ndodhen në manastirin e Koporinit te Velika Plana, ata të Stefan Uroshit III të Deçanit në Manastirin e Deçanit, ndërsa në kishën e Shën Gjergjit, në Oplenc, janë varrosur 29 pjesëtarë të familjes Karagjorgjeviq, apo gjashtë gjenerata të kësaj dinastie mbretërore të Serbisë.

klankosova.tv