Premtimet e Presidentit Thaçi

Presidenti i vendit, Hashim Thaçi në ceremoninë e inaugurimit të tij në pozitën e të parit të shtetit ka thënë se ai do të jetë gardian i kushtetutshmërisë dhe i të drejtave e lirive të qytetarëve të vendit, njofton Klan Kosova. "Në sistemin tonë demokratik Presidenti është gardian i kushtetutshmërisë. Në momentin që dhashë betimin, unë jam roje i këtij dokumenti". Ai është zotuar që do të punojë shumë në forcimin e shtetësisë së vendit, në dialogun ndërpartiak në vend, në rrugën e Kosovës drejt anëtarësimit në Bashkimin Europian dhe kundër dukurive ekstremiste që rrezikojnë të ardhmen e vendit, njofton Klan Kosova. "Do të punoj fort për forcimin e identitetit shtetëror. Jam i vetëdijshëm që muajt e fundit kemi pasur një imazh fort të mirë. Si roje i kushtetutës, do të jem i paanshëm politikisht". "Do të ofroj mundësi dialogu pa dallime partiake. Do të jemi së bashku në betejën politike drejt integrimit në Bashkimin Europian. Aleatëve të nderuar dhe miqve nga e tërë bota, ju premtoj se Kosova do të jetë hallkë e fortë në luftën kundër terrorizmit. Kosova e njeh kulturën e negociimit, dhe për gjërat që mund të merremi vesh i kemi dyert dhe zemrat e hapura". "Por me ata që kërcënojnë miqtë tanë e liritë dhe të drejtat tona, s’do të ketë asnjëherë kompromis. Kosova është pjesë e luftës globale, kundër ekstremizmit të dhunshëm. Kosovarët pa dallim besimi, kanë orientim euro-atlantik. Do të bëj gjithçka që t’i ndihmoj Kuvendit të republikës së Kosovës që t’i afrohemi integrimit në BE, NATO dhe OKB".

klankosova.tv

 .  .