Prej ligjit te mos zbatimi: Si dështoi sistemi i sigurimeve shëndetësore në Kosovë (VIDEO)

Gati 12 vjet më parë hyri në fuqi ligji, por zbatimi i tij nuk nisi sot e asaj dite. Më 30 prill të 2014-ës, Kuvendi i Kosovës miratoi Ligjin për Sigurimin Shëndetësor, i cili parashihte edhe shkallën e premiumeve për tri vitet e para. Që nga ajo kohë, jo vetëm që nuk nisi mbledhja e premiumeve, por nuk u themelua ende as Fondi i Sigurimeve Shëndetësore, organi që do t’i mblidhte këto tarifa dhe do t’i financonte shërbimet mjekësore, raporton Kiks Kosova. Tri vjet para votimit të Ligjit, në vitin 2011, Ministria e Shëndetësisë kishte nisur edhe krijimin dhe funksionalizimin e Sistemit Informativ Shëndetësor (SISh), një mekanizëm tjetër për të jetësuar Sigurimet Shëndetësore. Asokohe, projekti i ndarë në tri faza, planifikohej të implementohej në gjithë territorin e Kosovës, megjithatë, as tash në vitin 2026, ky sistem nuk është funksionalizuar ende. Në kohën kur u miratua Ligji për Sigurime Shëndetësore, ministër i Shëndetësisë ishte Ferid Agani. Që nga ajo kohë, stafetën e kësaj pune e morën edhe 6 ministra të tjerë. Pasardhësi i fundit i Aganit në këtë pozitë, Arben Vitia, nisi edhe amandamentimin e ligjit, apo ligjin e ri të titulluar Ligji për Sigurimin e Detyrueshëm të Kujdesit Shëndetësor, mirëpo ky ligj përfundoi në Gjykatën Kushtetuese, me kërkesë të PDK-së. E derisa ligji ishte ende duke u shqyrtuar nga Kushtetuesja, premtimi për jetësimin e sistemit të sigurimeve shëndetësore ishte në programet elektorale të të gjitha partive politike. Në programin e saj, Vetëvendosje premtoi se me hyrjen në fuqi të këtij ligji hapet rruga drejt funksionalizimit përfundimtar të sistemit të sigurimeve shëndetësore. Zbatimin e këtij sistemi e kishte vendosur si prioritet strategjik në platformën e saj Partia Demokratike e Kosovës. Në programin e këtij subjekti theksohej se ky sistem do të krijojë bazë të qëndrueshme financiare për shëndetësinë publike dhe t’i mbrojë qytetarët nga shpenzimet e papërballueshme shëndetësore. Lidhja Demokratike e Kosovës në programin e saj elektoral premtoi se mbledhja e premiumeve do të nisë së aplikuara që në vitin e dytë të mandatit, ndërkaq shërbimet e vitit të parë zotohej se do të mbuloheshin nga një buxhet i ndarë nga buxheti qendror. Ndërkaq, Aleanca për Ardhmërinë e Kosovës premtoi sigurimin e buxhetit dyvjeçar për fondin e Sigurimeve Shëndetësore për të gjithë qytetarët. Detajet i gjeni në kronikën më poshtë: https://youtu.be/jfnnQbjyYVA