Postecoglou në mesin e të mëdhenjve

Trajneri i skuadrës së Tottenham-it, Ange Postecoglou është shpallur trajneri i muajit në kampionatin anglez Premier League për herë të tretë rresht. Fillimisht ky çmim iu besua në muajin gusht pastaj shtator dhe tani së fundmi e mori epitetin e më të mirit për muajin tetor përcjell klankosova.tv. Ai kështu bëhet vetëm trajneri i 4-të në kampionatin anglez që e fiton këtë çmim tri e më shumë herë rresht. Para tij këtë e ka arritur Antonio Conte nga tetori deri në dhjetor të vitit 2016. Pastaj ishte Jurgen Klopp që e mori çmimin nga nëntori e deri në janar të vitit 2020. Kurse rekordin e mban Pep Guardiola me 4 çmime si trajner i muajit nga shtatori e deri në dhjetor të vitit 2017.