Policia e Kosovës tregon qëllimin operativ për protestën e nesërme

Policia e Kosovës ka treguar planin operativ gjatë ditës së nesërme kur do të mbahet protesta e Lëvizjes Vetëvendosje për ta kundërshtuar marrëveshjen e Demarkacionit.

Sipas tyre protesta e 1 shtatori nuk është lajmëruar ashtu siç parashihet me procedurat dhe Ligjin mbi tubimet publike.

Qëllimi  i  planit operativ është:

• Mbajtja e rendit, qetësisë dhe sigurisë publike dhe zbatueshmëria e Ligjit në vend.


• Ndërmarrja e masave të nevojshme parandaluese, operative policore për të siguruar që mbarëvajtja e tubimit/protestës të kaloj e qetë dhe pa incidente dhe pjesëmarrësit të jenë në gjendje të shprehin qëllimin e tyre në mënyrë demokratike dhe në suaza ligjore.


• Garantimi i lëvizjes së lirë dhe shprehjes,


• Mbrojtja e jetës, pronës dhe pasurisë së qytetarëve dhe asaj shtetërore.


• Ndërmarrja e masave ligjore ndaj veprimeve të kundërligjshme dhe luftimi i dukurive negative që mund të shkaktojnë jo stabilitet në vend, që në çfarëdo mase do të rrezikonte Rendin, Qetësinë dhe Sigurinë Publike.

Policia e Kosovës ka apeluar tek të gjithë qytetarët që do të protestojnë që të jenë të kujdesshëm dhe të përmbahen nga çfarëdo veprim i dhunshëm.

Gjithashtu Policia ka apeluar edhe tek qytetarët dhe bizneset që nuk janë pjesë e protestës, por janë në afërsi të ambientit ku mund të zhvillohet kjo protestë, të jenë të kujdesshëm për shkaqe sigurie.

Për gazetarët që do të përcjellin këtë protestë, Policia e Kosovës ka rekomanduar që ata të pajisen me shenja apo xhaketa dalluese “PRESS”.