Lajmet e fundit
Policia e Kosovës ka reaguar ndaj një shkrimi të publikuar nga mediat serbe lidhur me një tentim kidnapimi të një të mituri në fshatin Plemetin të Komunës së Obiliqit.
Sipas PK-së, këto shkrime nuk i shërbejnë ruajtjes së rendit, qetësisë dhe sigurisë së përgjithshme për të cilën policia po punon me përkushtim dhe profesionalizëm, njofton Klan Kosova.
“Më datën 29.09.2020 rreth orës 14:00 Policia ka pranuar një informatë nga një qytetar serb i Kosovës me banim në fshatin Plemetin të Obiliqit, lidhur me dyshimet për tentim të kidnapimit të fëmiut të tij. Policia e Kosovës ka ndërmarr veprimet e menjëhershme duke dërguar njësinë policore së bashku me hetuesit policor, të cilët kanë kontaktuar dhe biseduar me palën ankuese lidhur me thirrjen telefonike. I njëjti ka njoftuar se fëmiu i tij kishte ardhur në shtëpi duke vrapuar, ku sipas tij, një veturë ishte ndalur pranë tij dhe fëmiu është frikësuar, nga se sipas tij kishin tentuar ta fusnin në veturë”, thuhet në reagimin e PK-së.
“Zyrtarët policor në prezencën e prindit kishin zhvilluar një bisedë verbale me fëmiun, ku deklarata dhe informacionet e tija ishin kundërthënëse dhe jo kredibile, të cilat ngjallnin dyshime. Vlen të theksohet se prindi i fëmiut nuk ka qenë i interesuar që të jep deklaratë apo për të iniciuar rast, pasi që edhe ai e kishte kuptuar dhe ngritur dyshimet se një gjë e tillë kishte ndodhur. Vlen të potencohet se të gjitha veprimet policore janë ndërmarr gjithnjë në konsultim dhe bashkërendim me prokurorin kompetent”.
Policia e Kosovës gjithashtu bën të ditur se ka ndërmarrë të gjitha veprimet që të shikohen mundësit e verifikimit me anë të kamerave rastin në fjalë.
“Policia e Kosovës ka ndërmarr veprime të vazhdueshme që të shikohet edhe mundësia e verifikimit përmes kamerave, për të vërtetuar se në atë interval kohorë kur ka lajmëruar qytetari, a ka kaluar ndonjë veturë apo edhe ndonjë kalimtar i rastit që ka qenë në afërsi. Megjithatë, pas verifikimeve në teren dhe shikimit të kamerave nga hetuesit kompetent policor, sipas incizimeve të intervalit kohor të lajmëruar, prej orës 12:30-13:45 kanë kaluar gjithsej (10) vetura dhe asnjë prej tyre, nuk përputhet me deklarimet e fëmiut”.
“Policia e Kosovës për të ruajtur rendin dhe garantuar sigurinë publike ka hartuar një plan veprimi operacional konkretisht në fshatrat e përziera (multietnike), gjegjësisht fshatin Babimovc, Plemetin dhe Vodicë, duke shtuar veprimtarinë patrulluese, si në aspektin preventiv po ashtu edhe operativ, me qëllim të parandalimit të ndonjë veprimi që ka për qëllim cenimin e sigurisë së qytetarëve tanë pavarësisht etnitetit që i takojnë ata”.
