Përurohet Parku Arkeologjik “Ulpiana”

Është përuruar zyrtarisht Parku Arkeologjik “Ulpiana”. Në këtë përurim kanë marrë pjesë kryeministri Isa Mustafa dhe ministri i Kulturës, Rinisë dhe Sportit, Kujtim Shala, njofton Klan Kosova. “Trashëgimia kulturore e Kosovës është vlerë e Kosovës dhe vlerë e secilit qytetar të saj. Ajo është e gjithë botës sepse ka vlera universale për njerëzimin mbarë. Prandaj, secili qytetar duhet ta ruajë trashëgiminë kulturore në Kosovë dhe ta gëzojë e ta shijojë atë". "Kosova mburret me këtë trashëgimi kulturore prej kohërave më të vjetra e deri më sot. Kosova, po ashtu, mburret me trashëgimi të larmishme të krijuar gjatë mijëvjeçareve dhe shekujve të kaluar nga të gjithë njerëzit që kanë jetuar në këto treva. Kjo është trashëgimi e Kosovës dhe duhet të mbrohet, të ruhet sepse na përket të gjithë neve”.

Më tej, kryeministri Mustafa tha se Trashëgimia kulturore e Kosovës dhe trashëgimia arkeologjike si kjo në Ulpianë, ka qenë dhe mbetet prioritet i Qeverisë së Republikës së Kosovës.

“Qeveria e Republikës së Kosovës dhe Ministria e Kulturës, do të vazhdojnë të përkrahin institucionet e trashëgimisë kulturore, duke ngritur buxhetin dhe duke rregulluar fushën e trashëgimisë kulturore me ligje, akte nënligjore, strategji e reformime institucionale”.

Shumë gjurmë të periudhës së gurit e monedha të kohës romake, veç tjerash janë gjetur në këtë pjesë. Ky park përkohësisht do të jetë nën menaxhimin e Ministrisë së Kulturës, ndërkaq çmimi që do të paguajnë vizitorët nuk është caktuar ende. Në këtë park do të punësohen shtatë persona, ndërsa deri më tani në këtë lokacion janë shpenzuar më shumë se 500 mijë euro e punime do të ketë ende.

klankosova.tv