Përkrahet kërkesa për ndarjen e 70 mijë eurove për Teatrin e Gjilanit

Komiteti për Kulturë, Rini e Sport , të hënën, i ka dhënë mbështetje kërkesës së Njësisë për Kulturë, Rini e Sport për ndarjen e një shumë prej 70 mijë euro për Teatrin e Qytetit të Gjilanit, si nevojë emergjente për funksionimin e këtij institucioni, i cili prej disa vitesh po përballet me probleme të tilla, shkaku i statusit të padefinuar. Shpresa Kurteshi, kryesuese e KKRS, ka thënë se këto mjete janë të nevojshme për kompensimin e pagave të aktorëve për 6 muaj si dhe për financimin e tri shfaqjeve të planifkuara për këtë pjesë të dytë të vitit. Ajo ka thënë se KKRS i ka trajtuar rregullisht dhe me përkushtim të madh të gjitha problemet në Teatër dhe është shprehur optimiste se kërkesa për ndarjen e mjeteve, do të has në përkrahje edhe te Komitetit për Politikë dhe Financa si dhe në Kuvendin Komunal, ku merret vendimi përfundimtar, transmeton Klan Kosova.