Për të shmangur zgjedhjet, avokati Koci kërkon nënshkrimet për kandidat të dytë për President

Avokati Arianit Koci po do t’i hyjë garës për President të vendit. Përmes një postimi në Facebook, ai ka kërkuar 30 nënshkrime që të hyjë në garën për të parin e shtetit, por vetëm si kundër-kandidat i Glauk Konjufcës. Këtë, ai tha se po e bën që vendi të mos hyjë përsëri në cikël zgjedhjesh dhe bllokadash institucionale. “Për ta formalizuar kandidimin duhen 30 nënshkrime deputetësh. Prandaj, i ftoj deputetët, qoftë të pozitës apo të opozitës, të m’i japin nënshkrimet sot, në mënyrë që të plotësohet kushti i dy kandidatëve për zgjedhjen e Presidentit”. “Me vetëdije dhe vullnet të plotë po e bëj këtë hap, edhe pse e di se mund të më dëmtojë personalisht. Megjithatë, kjo është një iniciativë që vendi të mos hyjë përsëri në cikël zgjedhjesh dhe bllokadash institucionale. Interesi i vendit tim është mbi mua”, shkroi Koci në postimin e tij. Ai shtoi se është i vetëdijshëm që nuk ka gjasa, “por, për të shmangur zgjedhje të reja dhe bllokimin e institucioneve, po ofrohem si kundërkandidat i Glauk Konjufcës”. Sipas Kocit, me këtë raport të forcave, “nuk besoj se edhe pas zgjedhjeve të reja do të ketë ndonjë rezultat që do ta ndryshojë esencialisht gjendjen”. Avokati tha se nuk e ka kontaktuar askënd për t’ia kërkuar votën dhe tha se as që do ta thërrasë. “Këtë hap po e bëj si një qytetar që nuk dëshiron ta shohë vendin e tij keq”, deklaroi avokati Arianit Koci. /Klankosova.tv