Pensionistët dhe rastet me asistencë sociale, llogaritë e shërbimeve bazike nëpër banka do t’i kenë falas

Banka Qendrore e Kosovës ka njoftuar se ka shkuar mbi 320 mijë numri i llogarive për shërbime bazike. Ky institucion ka theksuar se nga 1 janari i 2024-ës janë dy kategori që lirohen nga pagesa për llogaritë. “Rregullorja përcakton se për kategoritë e konsumatorëve që i përkasin grupit të konsumatorëve të cenueshëm që përfitojnë nga të drejtat e parashikuara me legjislacionin që rregullon pensionet dhe asistencën sociale në Republikën e Kosovës, nuk do të kenë tarifë, pra do të janë falas nga 1 janari 2024”, thuhet në njoftimin e BQK-së, përcjell KlanKosova.tv. “Kurse, për kategoritë tjera, bankat do të ofrojnë shërbimet e përcaktuara me një tarifë të arsyeshme mujore që nuk mund të jetë më e lartë se 0.12% e vlerës së pagës mesatare neto mujore në Republikën e Kosovës”.