Lajmet e fundit
Këshilli Drejtues i Shoqatës së Prokurorëve të Kosovës ka diskutuar sot për gjendjen pas dorëheqjes së ish-prokurorit Elez Blakaj, ku dhe bënë këtë reagim publik:
Si institucion joqeveritar, kjo shoqatë, që si obligim statutar ka të mbrojë interesat e prokurorëve të shtetit, konsideron se menaxhmenti i sistemit prokurorial nuk do të degradohet nga qarqet e caktuara politike apo individë nga shoqëria civile, pasi kjo konsiderohet ndërhyrje direkte në punën e pavarur të sistemit prokurorial dhe tendencë për të dëmtuar hetimet në rastet e caktuara penale.
Shoqata e Prokurorëve të Kosovës njofton opinionin publik se deri më tani asnjë prokuror i sisitemit prokurorial të Kosovës, duke përfshirë dhe z. Blakaj, nuk ka shprehur asnjë shqetësim, qoftë si kërcënim apo si ndikim në punën e tij të pavarur dhe të paanshme nga kushdoqoftë.
Deklarimet publike për kinse kërcënimet dhe ndikimet brenda sistemit prokurorial janë për të mbuluar interesat e tij personale apo të kujtdotjetër. Për më tepër, shoqata zotohet se do të reagojë më fuqishëm, duke kërkuar përgjegjësi nga prokurorët që me veprimet e tyre dëmtojnë imazhin e sistemit prokurorial, interesat e qytetarëve dhe institucioneve shtetërore të Republikës së Kosovës.
Shoqata e Prokurorëve të Kosovës mbështet fuqishëm punën e çdo prokurori individualisht dhe organeve menaxhuese të sistemit individuale dhe kolektive dhe dënon çdo tendencë për të denigruar përkushtimin e secilit prokuror në mënyrë individuale dhe kolektive, gjë që është plotësisht e papranueshme dhe nuk i ndihmon zbatimit të Ligjit në Republikës e Kosovës.
