Pas raportimit të emisionit “Fol me Arin” nis asfaltimi i rrugës “Ulëza” në Hajvali (VIDEO)

Pas një vargu ankesash të qytetarëve për gjendjen e rënduar të rrugës “Ulëza” në lagjen “Hajvalia” të kryeqytetit, duket se problemi më në fund po shkon drejt zgjidhjes. Kjo rrugë, e cila për një kohë të gjatë ka qenë e paasfaltuar, ka shkaktuar shqetësime të vazhdueshme për banorët e zonës. Rasti është trajtuar edhe në emisionin “Fol me Arin”, ku qytetarë të shumtë kanë telefonuar për të shprehur pakënaqësitë e tyre. Madje, ekipi i emisionit ka realizuar edhe një kronikë nga terreni për të pasqyruar gjendjen reale të rrugës. Lidhur me këtë çështje, ka reaguar drejtoresha e Investimeve Kapitale në Prishtinë, Zyhrije Pllana, e cila ka bërë të ditur se punimet tashmë kanë nisur ku procesi është duke u zhvilluar sipas planifikimit. “Punimet kanë filluar dhe janë duke vazhduar sipas planit. Aktualisht jemi në fazën e përgatitjes së segmentit për asfaltim. Brenda një jave, rruga pritet të përfundojë dhe të jetë e gatshme për qarkullim.” ka thënë ajo. /Klankosova.tv https://www.youtube.com/watch?v=GkqfqZBl3Fg