Lajmet e fundit
Papa Françeskut i është përmirësuar paksa gjendja shëndetësore, është vigjilent dhe u ngrit nga shtrati për të ngrënë mëngjes të enjten, tha Vatikani, ndërsa Papa e kaloi ditën e shtatë në spital duke luftuar me pneumoni.
88-vjeçari po trajtohet në spitalin Gemelli të Romës, ku u shtrua më 14 shkurt, pasi pati vështirësi në frymëmarrje për disa ditë.
Zëdhënësi i Vatikanit, Matteo Bruni, tha në një përditësim të shkurtër se Papa kishte fjetur mirë dhe kishte ngrënë mëngjes ndërsa ishte ulur në një kolltuk.
Gjendja e Papës ishte e qëndrueshme dhe ai kishte treguar "përmirësim të lehtë" në rezultatet nga analizat e fundit të gjakut, tha Vatikani në deklaratën e fundit.
Papa Françesku vuan nga pneumonia e dyfishtë, një infeksion serioz që mund të inflamojë dhe dëmtojë të dy mushkëritë dhe e bën frymëmarrjen më të vështirë, shkruan Reuters, transmeton Klankosova.tv.
Dy kardinalë katolikë shprehën shpresë për shërimin e Papës.
"Unë mendoj se ka një ndjenjë shprese dhe ai do ta kalojë atë, falë Zotit," tha kardinali spanjoll Juan Jose Omella. Kryepeshkopi italian Giuseppe Satriano e quajti Papën një "luftëtar" dhe tha: "Ai do ta fitojë këtë betejë".
