Lajmet e fundit
Në kuadër të punimeve të Konferencës së Frankofonisë, e cila po i zhvillon punimet në kryeqytetin armen, Jerevan, ministri i Jashtëm, Behgjet Pacolli, ka takuar përfaqësuesin e Republikës së Seychelles, në Organizatën e Frankofonisë, me të cilin ka diskutuar për gjetjen e mundësive për krijimin e hapësirave të bashkëpunimit ndërmjet dy shteteve.
Me këtë rast Pacolli ka kërkuar nga ambasadori i këtij shteti, Sylvestre Radegonde , njohjen e Republikës së Kosovës, njofton MPJ, përcjell Klan Kosova.
“Pata kënaqësinë të takojë përfaqësuesin e Republikës së Seychelles në këtë organizatë, Ambasadorin, Sylvestre Radegonde. Më Ambasadorin Radegonde biseduam për gjetjen e mundësive për krijimin e hapësirave të bashkëpunimit ndërmjet dy shteteve tona. Po ashtu Ambasadorit Radegonde i shpreha kërkesën tonë për njohjen e pavarësisë së Kosovës dhe vendosjen e marrëdhënieve diplomatike. Në ditët në vijim, me qëllim të diskutimit më të hollësishëm të këtyre temave, pres ta takojë edhe me Ministrin e Jashtëm të këtij shteti”, ka thënë Pacolli.
Në margjina të kësaj ngjarje të rëndësishme me karakter ndërkombëtar, kryediplomati kosovar, Pacolli, pritet të zhvillojë një sërë takimesh bilaterale me homologë të tij, që po marrin pjesë në këtë takim, me qëllimin e shqyrtimit të mundësive për thellimin e mëtejmë të bashkëpunimit reciprok në mes dy vendeve si dhe prezantimit të kërkesës për mbështetjen e subjektivitetit dhe integrimit të Kosovës në Organizata Ndërkombëtare.
