Nuk kishin leje nga MPJ, Partizanit të Beogradit i refuzohet hyrja në Kosovë

Policia e Kosovës ka njoftuar se ia ka refuzuar hyrjen klubit të Partizanit të Beogradit në Kosovë pasi që ata nuk kanë poseduar leje për hyrje nga Ministria e Kulturës, Rinisë dhe Sportit. Ata po ashtu kanë refuzuar hyrjen e një veture me targa BG ku gjendeshin një zyrtar dhe tre persona të tjerë po ashtu me mungesë lejeje nga MPJ. "Pas sqarimeve dhe informacioneve zyrtare që iu janë dhënë, të njëjtit janë kthyer në drejtim të Serbisë", thuhet në komunikatën e Policisë së Kosovës. Më poshtë keni komunikatën e plotë të tij: Policia e Kosovës, në pikë kalimin kufitar Jarinje, sot rreth orës 11:40/45 ia ka refuzuar hyrjen një veture me targa “BG”, në të cilën gjendeshin një zyrtar dhe tre persona të tjerë, si dhe një autobusi po ashtu me targa “BG”, i cili kishte ardhur nga Serbia në drejtim të Republikës së Kosovës (RKS). Personit zyrtar dhe shoqërueseve të tij me veturën Audi me targa “BG”, iu është refuzuar hyrja në Republikën e Kosovës, pasi që të njëjtit nuk kanë poseduar leje për hyrje nga Ministria e Punëve të Jashtme e RKS-së. Po ashtu autobusi i cili kishte ardhur nga Serbia në drejtim të RKS-së, në të cilin kanë qenë klubi i basketbollit “Partizani i Beogradit”, iu është refuzuar hyrja pasi të njëjtit nuk kanë poseduar leje për hyrje nga Ministria e Kulturës, Rinisë dhe Sportit (Federata e basketbollit të RKS-së). Pas sqarimeve dhe informacioneve zyrtare që iu janë dhënë, të njëjtit janë kthyer në drejtim të Serbisë.