Nis në QNR numërimi i votave me postë

Nga ora 10:00 në Qendrën e Numërimit dhe Rezultateve ka nisur numërimi i rreth 13 mijë e 500 fletëvotimeve me postë që janë pranuar nga KQZ gjatë periudhës së votimit 19 shtator – 5 tetor 2019.

“Ky numërim fillon pas vlerësimit që i është bërë pakove me fletëvotime që kanë ardhur gjatë periudhës së votimit përmes postës. Vlerësimi, si proces, ka për qëllim të identifikojë një fletëvotim me personin që e ka dërguar pakon, në mënyrë që fletëvotimi të aprovohet ose refuzohet”, ka thënë zëdhënësi i KQZ-së, Valmir Elezi, transmeton Klan Kosova.

“Kësisoj, gjatë periudhës së vlerësimit janë proceduar dhe vlerësuar 16 mijë e 189 pako të supozuara me fletëvotime, prej tyre 13 mijë e 491 janë aprovuar, ndërsa 2 mijë e 698 janë refuzuar”.

Arsyet se përse janë refuzuar sipas KQZ-së rreth 2 mijë e 700 persona janë si në vazhdim:

• 1 mijë e 74 persona që nuk kanë aplikuar në periudhën për t’u regjistruar si votues jashtë vendit;


• 204 aplikues të cilët janë refuzuar gjatë periudhës së aplikimit për t’u regjistruar si votues jashtë vendit;


• 62 persona të cilët janë dërguar pako me fletëvotime më shumë se një herë;


• 797 raste të tjera kur personat që nuk janë identifikuar që kanë dërguar fletëvotim; dhe


• 561 persona që nuk e kanë dëshmuar identitetin me dokumente valide të identifikimit (që kanë dërguar kopje të dokumenteve me afat të skaduar).