Nga bisedimet për paqe drejt një bllokade të re: Si paraqitet situata në Lindjen e Mesme

Presidenti i ShBA-ve, Donald Trump, ka njoftuar se Marina amerikane do të vendosë një bllokadë në Ngushticën e Hormuzit, duke filluar nga dita e hënë në orën 10:00 sipas kohës lindore, pasi negociatat me Iranin përfunduan pa marrëveshje. Ushtria amerikane bëri të ditur se bllokada do të synojë anijet që hyjnë dhe dalin nga portet iraniane, transmeton Klankosova.tv. Sipas CNN, zhvillimet e fundit pritet ta rikthejnë ShBA-në dhe Iranin në një kurs përplasjeje, pas njoftimit të armëpushimit mes tyre, duke rritur më tej pasiguritë në ekonominë globale në mes të krizës historike të naftës dhe gazit. Gjatë fundjavës, një sërë ngjarjesh çuan në këtë përshkallëzim, Zyrtarë nga ShBA dhe Irani mbërritën në Pakistan të shtunën për bisedime ballë për ballë. Pak orë pas nisjes së takimeve, ekspertë nga të dyja palët në fushat ekonomike, ushtarake, ligjore dhe bërthamore zhvilluan diskutime të ndara. Negociatat vazhduan gjatë natës deri në orët e para të së dielës. Agjencia iraniane Tasnim raportoi se mbetën sfida të mëdha, duke përmendur “kërkesa të tepruara” nga ana e SHBA-së. Zëvendëspresidenti i ShBA-s, JD Vance njoftoi më pas se nuk ishte arritur marrëveshje, duke theksuar si pikë kyçe refuzimin e Iranit për t’u zotuar se do të heqë dorë nga armët bërthamore. Vance u largua nga Pakistani menjëherë pas konferencës për media, ndërsa sipas një zyrtari amerikan, asnjë anëtar i delegacionit amerikan nuk qëndroi pas përfundimit të bisedimeve, gjithashtu edhe delegacioni iranian u largua. Kryetari i Parlamentit iranian, Mohammad Bagher Ghalibaf, i cili udhëhoqi ekipin negociator, deklaroi se SHBA nuk arriti të fitojë besimin e palës iraniane. Presidenti Trump më pas njoftoi se Marina amerikane do të nisë bllokimin e anijeve në Ngushticën e Hormuzit dhe do të ndërhyjë ndaj çdo anijeje që ka paguar tarifë ndaj Iranit. Në një intervistë për Fox, Trump tha se SHBA dhe vende të tjera do të dërgojnë mjete për pastrimin e minave detare në këtë zonë strategjike, transmeton Klankosova.tv. Nga ana tjetër, Garda Revolucionare Islamike e Iranit paralajmëroi se çdo anije ushtarake që afrohet në ngushticë “do të përballet me përgjigje të ashpër dhe vendimtare”, sipas agjencisë Fars. Shtëpia e Bardhë publikoi gjithashtu vijat e kuqe që, sipas saj, Irani nuk i pranoi gjatë negociatave, shumica prej të cilave kanë qenë më herët të refuzuara nga Teherani. Komanda Qendrore e ShBA-së bëri të ditur se bllokada detare do të zbatohet për të gjithë trafikun që hyn dhe del nga portet iraniane duke nisur nga ora 10:00 të së hënës. Ndërkohë, çmimet e naftës u rritën sërish mbi 100 dollarë për fuçi pas njoftimit për bllokadën.