Lajmet e fundit
Planet e diskutueshme të Kryeministrit izraelit Benjamin Netanyahu për një ofensivë të re ushtarake në Rripin e Gazës kanë ngritur shqetësime nga udhëheqësia e ushtrisë, kundërshtime nga familjet e pengjeve dhe frikë se mund të shkaktojnë më shumë viktima palestineze.
Ato gjithashtu rrezikojnë të izolojnë më tej vendin e tij.
Në një mbledhje të kabinetit të sigurisë që zgjati 10 orë, ministrat miratuan propozimet për “marrjen nën kontroll të qytetit të Gazës”, e cila ka gjasa të jetë faza e parë e planit të ushtrisë izraelite për të marrë kontrollin e plotë të Gazës, siç ka deklaruar Netanyahu se është synimi i tij, raporton BBC, transmeton Klankosova.tv.
Një deklaratë e lëshuar nga zyra e tij nuk e përdori fjalën “okupim”, por në thelb, kjo është ajo që nënkuptojnë planet.
Nuk është e qartë se kur do të fillojnë operacionet, të cilat mund të zgjasin me muaj, pasi ushtria do të duhet të thërrasë mijëra rezervistë, të rraskapitur pas shërbimeve të shumta, dhe të organizojë evakuimin e detyruar të banorëve nga një zonë ku jetojnë rreth 800,000 palestinezë. Shumica prej tyre janë zhvendosur disa herë gjatë këtij konflikti.
Planet ka gjasa të nxisin dënime të reja nga vendet që kanë shprehur zemërim për situatën në Gaza dhe që i kanë bërë thirrje Izraelit ta përfundojë luftën, e cila filloi si përgjigje ndaj sulmeve të Hamasit më 7 tetor 2023.
Kryeministri i Mbretërisë së Bashkuar, Sir Keir Starmer, e ka përshkruar vendimin si “të gabuar” dhe i ka kërkuar Izraelit ta rishqyrtojë atë “menjëherë”.
Megjithatë, presioni ndërkombëtar ka pak gjasa të detyrojë Netanyahun të ndryshojë kurs.
Ka pakënaqësi edhe brenda vendit. Sondazhet tregojnë se shumica e popullit izraelit përkrahin një marrëveshje me Hamasin për lirimin e 50 pengjeve, nga të cilët mendohet se 20 janë ende gjallë, dhe përfundimin e luftës.
Kërcënimi për një okupim të plotë mund të jetë pjesë e një strategjie për të detyruar grupin të bëjë lëshime në bisedimet e ndërprera për armëpushim.
Udhëheqësit izraelitë thonë se Hamasi, për momentin, nuk është i interesuar për negociata pasi, sipas tyre, grupi ndihet i fuqizuar – një mendim që duket se ndahet edhe nga administrata Trump, e cila nuk ka shprehur kundërshtime ndaj planeve të Izraelit.
Shumë besojnë se Netanyahu po e zgjat konfliktin për të siguruar mbijetesën e koalicionit të tij, i cili varet nga mbështetja e ministrave ultranacionalistë që kanë kërcënuar se do të largohen nga qeveria nëse lufta përfundon.
Itamar Ben Gvir dhe Bezalel Smotrich kanë mbrojtur publikisht atë që e përshkruajnë si migrim vullnetar të palestinezëve nga Gaza – që në fakt mund të konsiderohet zhvendosje e detyruar e civilëve, një krim lufte – dhe ripopullimin e saj me hebrenj.
Idetë e Netanyahut kanë hasur në kundërshtim të fortë nga Shefi i Shtabit të ushtrisë, gjenerali Eyal Zamir, i cili, sipas mediave izraelite, e ka paralajmëruar kryeministrin se një okupim i plotë i Gazës “do të ishte një kurth” dhe do të rrezikonte jetën e pengjeve të mbetura.
Shumë nga familjet e pengjeve ndajnë këto shqetësime dhe thonë se mënyra e vetme për të siguruar lirimin e tyre është përmes një marrëveshjeje të negociuar me Hamasin dhe përfundimit të luftës.
Sipas gazetës Maariv, “vlerësimi mbizotërues është se shumica, nëse jo të gjithë, pengjet e gjalla [do të] vdesin” gjatë një ofensive të zgjeruar, ose të vrarë nga rojet e tyre, ose aksidentalisht nga ushtarët izraelitë.
