Nesër nis viti i ri shkollor, Nagavci: Mbi 90 përqind e mësimdhënësve janë vaksinuar

Ministrja e Arsimit, Arbërie Nagavci, ka bërë të ditur se janë bërë të gjitha përgatitjet për fillimin e vitit të ri shkollor që do të nis nesër. Nagavci mes tjerash bën të ditur se 90 përqind e mësimdhënësve dhe stafit tjetër që punon në shkolla janë vaksinuar ndaj COVID-19 ku më shumë se 65 përqind e tyre janë me të dy dozat, njofton Klankosova.tv. "Gjatë gjithë kësaj kohe, kam vizituar shumë shkolla dhe kam qenë në kontakt të vazhdueshëm me drejtues shkollash, mësues e prindër. Ndonëse situata me pandeminë na ka sjellë në një gjendje të vështirë e me shumë sfida, janë bërë përgatitjet e duhura për të filluar vitin e ri shkollor. Mbi 90% e mësimdhënësve dhe stafit tjetër që punon në shkolla janë vaksinuar. Më shumë se 65% prej tyre me të dy dozat". Nagavci thekson se përkundër progresit në vaksinimin e popullsisë, ky vit shkollor mund të jetë shumë sfidues, "Përkundër progresit në vaksinimin e popullsisë, e në veçanti të punonjësve të arsimit, ky vit shkollor mund të jetë shumë sfidues. Prandaj është e domosdoshme të respektohen masat mbrojtëse të rekomanduara nga profesionistët shëndetësor". "Kjo është mënyra më e mirë për të vënë pandeminë nën kontroll, duke i kontribuar mbarëvajtjes së procesit mësimor dhe ruajtjes së shëndetit publik. Mësuesit e drejtuesit e shkollave kanë shumë punë e përgjegjësi, por jam e bindur se angazhimi dhe kujdesi i tyre nuk do të mungojë. Vaksinimi, respektimi i masave si dhe bashkëpunimi në të gjitha nivelet përfshirë edhe prindërit, do të na mundësojë një vit të suksesshëm shkollor" ka shkruar Nagavci në Facebook.