Lajmet e fundit
Nëna e të dyshuarit për vrasjen e ish-kryeministri japonez, Shinzo Abe, është pjesë e Kishës së Unifikimit.
Një 41-vjeçar u arrestua të premten nën dyshimin se kishte shtënë në Aben, i cili vdiq pak orë më pas nga plagët e marra. Presidenti i degës së kësaj kishe në Japoni, Tomihiro Tanaka, e ka konfirmuar, në konferencën për shtyp, të hënën, që nëna e të dyshuarit është ndjekëse e tyre.
Tanaka nuk dha emër të saj por tha që ajo i qe bashkuar kishës më 1998, ishte larguar nga viti 2009, mirëpo ishte kthyer në vizitat e saj të rregullta në kishë dy vjet më parë.
Kisha e Unifikimit është një lëvizje fetare e themeluar më 1954 nga një anëtar kleri koreano-jugor, Sun Myung Moon, dhe ndjekësit e tij quhen Muni (Moonies).
Policia më herët kishte thënë që i dyshuari u kishte thënë që mbante inat me një organizatë fetare, emri i së cilës nuk dihet, dhe se ai në fakt kishte dashur ta vriste liderin e saj, por kishte vendosur më pas që ta vriste Aben.
I dyshuari i kishte thënë policisë që nëna e tij kishte bankrotuar, pasi kishte bërë një donacion te një organizatë fetare 20 vjet më parë, ndërkaq e kishte fajësuar Aben që e kishte promovuar atë grup fetar.
