Napoli stërvitet me dron, Hysaj kthehet titullar

Rikthimi i Hysajt cilësohet mjaft i rëndësishëm te Napoli, duke qenë se drejtuesi i stolit do të hedhë në fushë formacionin më të mirë, për të vijuar garën për titull me Juventusin. Ndërkohë, në stërvitjen e Hysajt me lojtarët e tjerë të skuadrës, bie në sy fakti që stafi teknik zhvilloi një stërvitje të veçantë. Seanca stërvitore është filmuar me dron nga ajri. Trajneri Sarri i kushtoi rëndësi lëvizjeve të katërshes difensive, pjesë e së cilës është edhe ylli i ri i Kombëtares shqiptare. Më pas, teknologjia nga ajri u shfrytëzua për të vëzhguar e përmirësuar edhe lëvizjet në fushë të reparteve të tjera, shkruan SuperSport.al. Teknika e stërvitjeve me dron nuk është e re për Napolin. Prej emërimit të trajnerit Sarri në fillim të sezonit, imazhet filmike nga lartë janë shfrytëzuar gjërësisht në klub, për të studiuar me detaje manovrat e skuadrës në fazën mbrojtëse dhe atë sulmuese.