Muriqi në mesin e tre golashënuesve më të mirë në La Liga, lë prapa emra të njohur

Sulmuesi i kombëtarës së Kosovës Vedat Muriqi, po vazhdon të shkëlqejë me paraqitjet e tij me Mallorcan në La Liga. Muriqi, aktualisht gjendet në mesin e tre golashënuesve më të mirë duke lënë prapa edhe shumë emra të njohur. Ai deri më tani ka arritur t'i realizojë nëntë gola. Robert Lewandowski i Barcelonës, Julian Alvarez i Atletico Madridit dhe plot emra të tjerë të mëdhenj janë prapa tij, e ndër të tjerë edhe Lamine Yamal e Raphinha. 31-vjeçari të shtunën shënoi supergol në fitoren 3:1 të Mallorcas ndaj Elches. Ndeshja i takoi xhiros së 16-të të kampionatit spanjoll. Ai realizoi me goditje mjeshtërore me kokë nga rreth 15 metra largësi. Me formën aktuale ky do të jetë edicioni më i mirë në karrierë për prizrenasin. Edicioni më i mirë i tij deri më tani ishte 2022/2023, kur për Mallorcan i realizoi 15 gola e tri asistime në 35 paraqitje në La Liga.