Morina: Drejtësia për Banjskën është e plotë vetëm kur identifikohen dhe dënohen organizatorët kryesorë

Të premten e 24 prillit do të shpallet aktgjykimi në rastin e njohur “Banjska”. Lidhur me këtë zhvillim, koloneli i Policisë, Refki Morina ka reaguar përmes një postimi në Facebook, duke shkruar mbi rëndësinë që pritet të ketë vendimi gjyqësor, por edhe sfidat që e shoqërojnë këtë proces. Sipas tij, verdikti do të jetë i rëndësishëm për përcaktimin e përgjegjësisë penale për të pandehurit që ndodhen në dispozicion të drejtësisë në Kosovë, si dhe për krijimin e një narrative zyrtare juridike për ngjarjen. Por njëherësh, Morina theksoi se problemi kryesor mbetet fakti që të dyshuarit kryesorë nuk ndodhen në Kosovë, por në Serbi, çka e komplikon ndjeshëm, sipas tij, procesin e drejtësisë. “Nëse verdikti gjyqësor shpallet më 24 prill, ai do të ketë rëndësi për përcaktimin e përgjegjësisë penale për të pandehurit që janë në dispozicion të drejtësisë në Kosovë krijimin e një narrative zyrtare juridike për ngjarjen. Por, problemi kryesor mbetet fakti që të dyshuarit kryesorë nuk ndodhen në Kosovë, por në Serbi kjo e komplikon drejtësinë!”, shkroi mes tjerash Morina. Koloneli i Policisë ka vënë në pah mungesën e një marrëveshjeje funksionale për ekstradim ndërmjet Kosovës dhe Serbisë, si dhe kufizimet e juridiksionit, duke bërë që gjykatat në Kosovë të mund të trajtojnë vetëm personat që kanë në dispozicion. Pastaj, ai flet edhe për një dimension tjetër të këtij rasti, i cili thotë se ka implikime të forta politike dhe ndërkombëtare, jo vetëm juridike. "Praktikat te ne janë: Mund të ketë dënime në mungesë për disa të dyshuar, nëse provat janë të mjaftueshme. Procesi mund të mbetet i pjesshëm, pa adresuar plotësisht zinxhirin komandues. Do të ketë presion ndërkombëtar ndaj Serbisë për bashkëpunim më të madh në hetim. Nëse verdikti shpallet, drejtësia konsiderohet e plotë vetëm kur identifikohen dhe dënohen organizatorët kryesorë, zbardhet plotësisht struktura e sulmit. Në këtë rast, hendeku midis vendimit gjyqësor në Kosovë dhe mungesës së të dyshuarve kryesorë mbetet sfida kryesore”, shkroi Morina. /Klankosova.tv