Mitrovicë: Hapet qendra e thirrjeve IQ to Link

Në Mitrovicë sot është bërë hapja e qendrës së thirrjeve IQ to Link. Drejtori i kësaj kompanie Jens Rechenbach, deklaroi se hapja e kësaj qendre do të ndihmojë sadopak në uljen e papunësisë në Kosovë. Ai shtoi se është i kënaqur me kushtet qe i janë ofruar në këtë vend për të investuar me kompaninë e tij, njofton Klan Kosova Ndërsa bëri me dije se nuk do të ndalet me kaq dhe se qendra si kjo e thirrjeve do të hapen edhe në qytetet tjera të Kosovës. Këtë ngjarje e përshëndeti edhe ambasadorja gjermane në Kosovë Angelika Viets, e cila tha se investimet si këto i duhen më së shumti këtij vendi dhe se shpreson që situata politike në Kosovë, të zgjidhet sa më shpejt në mënyrë që proceset në fusha të ndryshme të vazhdojnë e të mos ngecin. Hapjen e kësaj qendre e përshëndeti edhe ministri në detyrë i Punës dhe Mirëqenies Sociale Arban Abrashi. Ai deklaroi se investitorëve gjerman iu kanë ofruar ndihmë të pa kursyeshme në hapjen e kësaj qendre dhe se do të vazhdojnë të përkrahin projekte të tilla, njofton Klan Kosova. IQ to Link momentalisht ka qendrën e saj të thirrjeve në Prishtinë, Prizren dhe tash në Mitrovicë dhe ka të punësuar rreth 400 punëtorë.

klankosova.tv