Meta takohet edhe me Jahjagën

Kryetari i Kuvendit të Shqipërisë, Ilir Meta, pas takimit me liderët e Opozitës ka takuar edhe Presidenten e Kosovës, Atifete Jahjaga, njofton Klan Kosova. "Presidentja Jahjaga dhe kryetari Meta diskutuan për zhvillimet në Kosovë dhe përpjekjet për të tejkaluar situatën e krijuar në vend". "Presidentja Jahjaga e njoftoi kryetarin Meta për angazhimin e saj për të krijuar kushtet për dialog politik mes koalicionit qeverisës dhe subjekteve politike opozitare", thuhet në njoftimin e Presidencës. Meta ka thënë se në Kosovë po qëndron vetëm për vikend, por edhe po takohet me miqtë e tij, të cilat, siç tha ai, janë të shumtë. Ai ka mohuar të ketë ardhur në Kosovë për të ndërmjetësuar në krizën politike dhe çarjen mes Pozitës e Opozitës, por ka thënë se gjithsesi që po interesohet për problemet aktuale, sepse ndryshe do të ishte papërgjegjësi nga ana e tij. Meta dje vonë është takuar me homologun e tij Kadri Veseli, kurse sot gjatë ditës me tre liderët opozitarë – Visar Ymerin nga Lëvizjes Vetëvendosje, Ramush Haradinaj nga Aleanca për Ardhmërinë e Kosovës dhe Fatmir Limaj nga Nisma për Kosovën. Meta ka thënë se ka parë shumë mundësi për dalje nga kriza dhe gjetjen e një zgjidhje. Por, kryetari i AAK-së Haradinaj, në një intervistë pas takimit me Meten, ka mohuar se Opozita mund të lëvizë nga qëndrimet e mëparshme. Dialog me Qeverinë Haradinaj ka thënë se mund të ketë vetëm nëse plotësohen kushtet e tyre – heqja e nënshkrimeve nga Marrëveshje me Serbinë për Asociacionin dhe ajo me Malin e Zi për Demarkacionin, njofton Klan Kosova.

klankosova.tv