Lajmet e fundit
Një fluturim i American Airlines u detyrua të bënte një ulje emergjente në Aeroportin Ndërkombëtar të Denverit, Colorado, pasi një zjarr shpërtheu në avion, duke shkaktuar tym të dendur në ajër.
Pamjet nga vendngjarja tregojnë pasagjerët të mbledhur mbi krahun e avionit Boeing 737-800, disa duke mbajtur çanta, ndërsa flakët përfshinin pjesën e poshtme të avionit.
Sipas Administratës Federale të Aviacionit (FAA), pasagjerët përdorën rrëshqitëset emergjente për të arritur në tokë të sigurt.
Nuk ka raportime për lëndime të rënda, por 12 persona u dërguan në spital për trajtim të lehtë.
Avioni ishte nisur nga Colorado Springs drejt Aeroportit Ndërkombëtar Dallas Fort Worth në Teksas dhe u devijua për në Denver rreth orës 17:15 lokale, pasi ekuipazhi raportoi “vibrime në motor”. Pas uljes, avioni mori flakë gjatë lëvizjes në pistë, raporton BBC, transmeton Klankosova.tv.
American Airlines konfirmoi se në bord ndodheshin 172 pasagjerë dhe gjashtë anëtarë të ekuipazhit, të cilët u evakuuan të gjithë të sigurt.
Kompania tha se avioni kishte një “problem të lidhur me motorin”.
Dëshmitarët brenda aeroportit publikuan video në rrjetet sociale, ku shihen pasagjerët duke ecur mbi krahun e avionit, ndërsa tymi i zi përhapej në ajër.
Stafi i aeroportit u afrua me shkallë për të ndihmuar evakuimin. Zëdhënësi i aeroportit, Michael Konopasek, tha se zjarri u shua shpejt dhe nuk pati vonesa në fluturime.
Ky incident vjen pas një sërë ngjarjesh të fundit në aviacionin amerikan, që kanë ngritur shqetësime për sigurinë ajrore. Një aksident fatal në Washington DC la 67 të vdekur, kur një avion rajonal i American Airlines u përplas në ajër me një helikopter ushtarak Black Hawk./Klankosova.tv.
