Lajmet e fundit
Një bankë në Kinën Veriore, gjegjësisht në provincën Changzhi, ka rënë pre e kritikave të shumta pasi është publikuar një video, ku shihet se si punëtorët e kësaj banke janë turpëruar dhe abuzuar publikisht në skenë.
Sipas postimit në Facebook të People Daily, tetë punonjës të bankës Rural Commercial ishin në skenë gjatë një ngjarjeje të kompanisë dhe u dënuan nga menaxheri i tyre për mos “tejkalimin e vetvetes”, transmeton Klan Kosova.
Të tetë punëtorët u qortuan një e nga një nga menaxheri i tyre dhe u detyruan t’i rrëfejnë kolegëve se pse ishin larg përmbushjes së detyrave. Ai më pas shkoi prapa tyre dhe i goditi brutalisht me një vizore të madhe.
Pas një raundi të goditjeve, ai shihet duke i bërtitur dhe niset për një raund tjetër goditjesh të dhimbshme.
Qytetarët e këtij vendi e kanë kritikuar kompaninë për trajtimin “imoral” ndaj stafit dhe po kërkojnë që menaxheri, emri i të cilit nuk është bërë i ditur, të pushohet nga puna për poshtërimin publik që ua bëri.
