Gjykata e Lartë në Shqipëri zbardhi arsyetimin e vendimit përmes të cilit urdhëron Prokurorinë e Posaçme, SPAK-un, të hetojë dosjen “21 Janari”.
Vendimi i shpallur më 12 mars nga një Kolegj Penal i Gjykatës së Lartë i dha të drejtë Rajmonda Nikës, bashkëshortes së viktimës Aleks Nika. Bashkëshortja e Nikës, vrasja e të cilit më 21 janar 2011 është ende pa autor, kundërshtoi vendimin e SPAK-ut për të dërguar në Prokurorinë e Tiranës një kallëzim të bërë prej saj, ku janë të kallëzuar ish-kryeministri, Sali Berisha, ish-ministri i Brendshëm, Lulzim Basha dhe ish-kreu i Gardës, Ndrea Prendi.
Mes të tjerash në arsyetimin e Gjykatës së Lartë është paraqitur edhe transkriptimi i një videopërgjimi i ditës së ngjarjes, i cili nuk është marrë dhe as nuk është administruar prej drejtuesit të Prokurorisë së Posaçme para se të merrte vendimin për të shpallur moskompetencën lëndore, është një provë shumë e rëndësishme, e cila e bën kompetente vetëm SPAK-un për regjistrimin e këtij procedimi penal dhe hetimin e kësaj çështjeje.
Në vijim të kërkesës ankimore të paraqitur nga shtetasja Rajmonda Nika, citohen biseda që sipas palës ankuese ndodhen në videopërgjimin e datës 21.01.2011. Kështu, në komunikimin e parë realizohet kjo bisedë:
Ndrea Prendi: Alfred dëgjon?
Alfred Ahmetcenaj: Po dëgjoj.
Ndrea Prendi: Po afrohen shumë, duhet të jeni gati për zjarr.
Alfred Ahmetcenaj: Po të kuptova drejt.
Në bisedën e dytë:
Ndrea Prendi: Të mbahen armët në dorë gati për zjarr. Të mbahen armët në dorë gati për zjarr në ajër. Pastaj kur të them unë në trup.
Ndrea Prendi: Artan dëgjon? Artan dëgjon?
Artan Hoxha: Dëgjoj, dëgjoj.
Në bisedën e tretë:
Ndrea Prendi: Me të kaluar gardhi i telave do hapet zjarr luftarak.
Artan Hoxha: Kuptova, kuptova
Ndrea Prendi: Ky është urdhri, Dashamir dëgjuat.
Dy efektiva të njësisë speciale: Alfred ta ta ta gjakos.
“Pala ankuese parashtron se komunikimet (urdhrat) janë dhënë vetëm me radio nga komandanti i gardës për vartësit e tij. Pasi është dhënë urdhër për të qëlluar, është zbatuar, duke realizuar të shtënat një nga një dhe me breshëri, nuk është dhënë më asnjë urdhër tjetër për të qëlluar. Nga komunikimi me radio, menjëherë pas vrasjeve të protestuesve, ka rënë qetësi absolute tek komandanti i gardës dhe oficerët drejtues me të cilët ai komunikon. Komunikimi në vijim është sikur nuk ka ndodhur asgjë, madje nuk përmendet në asnjë moment që ka të vrarë apo të plagosur”.
I panjohur: 260 i Luanit, dëgjon?
260 i Luanit: Ju dëgjoj.
Në bisedën e katërt:
Audio: Menjëherë dëgjohen të shtëna tek e tek, sërish dëgjohen 8 të shtëna radhazi një nga një.
Ndrea Prendi: Alfred?
Alfred Ahmetcenaj: Po dëgjoj (dëgjohen 2-3 të shtëna tek e tek).
Ndrea Prendi: Kujdes municionin! Kujdes municionin!
Në bisedën e pestë
Ndrea Prendi: Martin më dëgjon? Agim më dëgjon? Agim? Agim? 202 i Tufanit më 202 i Tufanit: Këtu jam. Ngjitur, ngjitur.
Ndrea Prendi: Alfred, një grup i njësisë speciale këtu tek porta numër 2.
Alfred Ahmetcenaj: Të kuptova.
Ndrea Prendi: Artan më dëgjon?
Artan Hoxha: Dëgjoj.
Ndrea Prendi: Le ta djegin pemën nuk ka problem.
I panjohur: 260 e Luanit?
I panjohur: Luani 3...
Në vendimin e zbardhur, të përbërë nga 35 faqe në total, Gjykata e Lartë thekson se edhe Gjykata e Strasburgut në një vendimmarrje të mëhershme ka evidentuar mangësi specifike në hetimin për vdekjen e Aleks Nikës dhe se autoritetet kanë dështuar të kryejnë një hetim efektiv për ngjarjen.
Po referuar Strasburgut, Gjykata e Lartë thekson se përgjegjësia e mundshme e zinxhirit komandues të Gardës nuk është zbardhur nga hetimi përkatës. Pas zbardhjes së vendimit të Gjykatës së Lartë, SPAK-u pritet të regjistrojë kallëzimin e Rajmonda Nikës dhe të nisë hetimet për “21 Janarin”. /a2news
●●●
EVSHKRIMI NGA
E V
Editorial nga Klan Kosova — ndjek lajme dhe zhvillimet e tjera kryesore të vendit.
