Lajmet e fundit
Rreth 110 persona janë lënduar lehtë nga një zjarr i fuqishëm që ka arritur në skajet e jashtme të Marsejës, qyteti i dytë më i madh në Francë.
Ministri i Brendshëm Bruno Retailleau tha se rreth 800 zjarrfikës janë në terren dhe përpjekjet për shuarjen e flakëve do të vazhdojnë "gjatë gjithë natës", pasi zjarri ende nuk është vënë nën kontroll.
Kryetari i bashkisë së Marsejës, Benoît Payan, tha më herët se "batalioni detar i zjarrfikësve po zhvillon luftë guerile, me zorrët e ujit në dorë", raporton BBC, transmeton Klankosova.tv.
Sipas mediave franceze, të paktën 400 persona janë evakuuar nga shtëpitë e tyre. Thuhet se nëntë zjarrfikës janë lënduar. Banorëve u është kërkuar të qëndrojnë në shtëpi dhe të mos largohen përveçse nëse u jepet urdhër, në mënyrë që rrugët të jenë të hapura për automjetet emergjente.
Në kulmin e saj, zjarri është përhapur me një shpejtësi prej 1.2 km në minutë, tha kryetari i bashkisë për BFMTV. Ai fajësoi erërat e forta, bimësinë e dendur dhe terrenin e pjerrët.
Sipas ministrisë së brendshme, deri të martën në mbrëmje janë lënduar lehtë 110 persona, përfshirë nëntë zjarrfikës dhe 22 policë.
