Mbreti i NBA-së bëhet më i vjetri në ligë me tre dyshifrorë të trefishtë radhazi

LeBron James e ka “tmerruar” historinë. Të paktën atë të NBA-së. Basketbollisti amerikan është koshashënuesi më i mirë i kësaj lige e po ashtu edhe lojtari më i vjetër aktiv në të. Më 30 dhjetor, i bën 40 vjet. Pos këtyre dy fakteve të çmendura, James vazhdoi ta “bajatizojë’ historinë e NBA-së pasi u bë i pari basketbollist që ia doli të luajë bashkë me të birin Bronny (sigurisht, shumë më mirë se ai) në kampionatin më të fuqishëm të këtij sporti në botë. Por, nuk e la me kaq. Historianëve të NBA-së u nxori punë shtesë, të mërkurën, duke i detyruar t’ia shënojnë edhe një rekord, në fitoren e ekipit të tij, Lakers, kundër Memphis Grizzlies 128 me 123. 23-shja e Los Angeles u bë lojtari më i moshuar i ligës që regjistron tre dyshifrorë të trefishtë, radhazi. Ai shënoi 35 pikë, kapi 12 topa dhe dhuroi 14 asiste në 37 minuta sa qëndroi në parket, njofton Klankosova.tv. Dyshifrorin tjetër të trefishtë e pati më 10 nëntor, në ndeshjen kundër Toronto Raptors. James këtu regjistroi 19 pikë, 10 rebounds dhe 16 asiste. Tripple double-in tjetër para tij e arriti ndaj Philadelphia 76 ers, më 8 nëntor. Aty, mbreti luajti me 21 pikë, 12 kërcime dhe 12 “ndihmesa”. Kjo e arritur e cmendur nuk është kushedi se cka, për të. “Thjesht, po tregoj durim dhe po shfrytëzoj atë që po ma mundëson mbrojtja”, tha ai për serinë e tij të dyshifrorëve të trefishtë, transmeton Neë York Times. “E bëj këtë gjë qe një kohë. E kuptoj kohën dhe shënoj. I kuptoj valët dhe lëkundjet e lojës. Pra, nuk është kurrgjë e re kjo për mua”. Në sezonin e ri në NBA, veterani që luan aktivisht në këtë ligë qe 22 vjet, është duke regjistruar 24.3 pikë, 8.1 rebounds dhe 9.4 asiste për ndeshje. Në gjashtë vite për aq sa është në Lakers, vetëm njëherë më parë ka patur shifra më të mira, njofton Klankosova.tv. “Ai e ka mjeshtëruar lojën”, tha trajneri i tij, JJ Redick. “Qartazi, ne nuk fitojmë dot pa të”. Dyshifrori i trefishtë i së mërkurës u bë i 116-ti në karrierën e James, dhe i 40-ti që ai e realizon duke shënuar të paktën 30 pikë. Vetëm Luka Donciq, Russel Westbrook dhe Oscar Robertson kanë më shumë triple doubles me kaq poena, se Lebron.