Mbappe i pandalshëm në Evropë, ka shënuar më shumë gola se 16 skuadra në Champions

Kylian Mbappe po konfirmon edhe një herë statusin e tij si një nga futbollistët më vendimtarë në arenën eulvropiane dhe favoritin e madh për "Topin e Artë". Me dy golat e shënuar ndaj Monacos, në fitoren e thellë 6:1 të Real Madridit, sulmuesi francez ka arritur kuotën e 11 golave në këtë edicion të Ligës së Kampionëve. Një statistikë që flet shumë është fakti se Mbappe ka shënuar më shumë gola sesa plot 16 skuadra pjesëmarrëse në këtë kompeticion. Një tregues i qartë i ndikimit të tij vendimtar dhe formës së jashtëzakonshme që po kalon. Falë këtij rendimenti, Mbappe kryeson aktualisht listën e golashënuesve të Champions League, duke u shndërruar në lider absolut të garës. Paraqitjet e tij po bëhen gjithnjë e më përcaktuese për ambiciet e Real Madridit në Evropë, ndërsa tifozët shijojnë spektaklin e një lojtari që duket i pakapshëm për mbrojtjet kundërshtare. Në këtë ritëm, Mbappe jo vetëm që po udhëheq skuadrën e tij drejt fazave finale, por po vendos edhe standarde të reja individuale në kompeticionin më prestigjioz për klube.