Mbahet protesta kundër ndërtimit të Xhamisë së Madhe në Prishtinë

Në lagjen "Dardania" në Prishtinë ka filluar të mbahet protesta kundër ndërtimit të Xhamisë së Madhe, njofton Klan Kosova.

Kjo protestë është organizuar nga ish-komandanti i Ushtrisë Çlirimtare të Kosovës, tashmë pjesë e OVL-së dhe UÇK-së, Binak Gashi.

Ai ka thënë se xhamia është e financuar nga Turqia, dhe se Kosova nuk është provincë e Turqisë por ”histori e Ilirisë që nga koha pellazge”.

Organizatori i protestës nuk ka marrë pjesë, asaj i janë përgjigjur një grup i qytetarëve të cilët thanë se e kundërshtojnë ndërtimin e xhamisë, duke thënë se aty duhet të jetë ndonjë park apo shkollë.

Ndërsa 3 persona të tjerë kanë dalë kundër mbajtjes së kësaj proteste, të cilët thanë se ndërtimi i xhamisë duhet të vazhdojë si ndërtimi i katedrales.

Ndërtimi i kësaj xhamie veçse ka filluar dhe parashihet të kushtojë mbi 30 milionë euro.