Majlinda pranon medaljen e artë

Xhudistja kosovare, Majlinda Kelmendi, ka arritur që të fitojë medaljen e artë në Lojërat Olimpike Rio2016 dhe kështu ka shkruar historinë duke u bërë sportistja e parë që ka fituar medalje për Republikën e Kosovës, njofton Klan Kosova. Atë që nuk e bëri katër vjet më parë në Londër, si garuese e Shqipërisë, Majlinda Kelmendi, e realizoi sonte në Rio, por duke garuar për Kosovën, në të parën paraqitje të shtetit tetë vjeçar në Lojërat Olimpike. Vajza nga Peja mposhti në finale italianen, Odette Giuffrida, duke i sjellë Kosovës arin më të çmuar të fituar ndonjëherë në historinë e sporteve të saj, njofton Klan Kosova. Pas Londra2012 ajo kishte fituar gjithçka mund të fitonte një xhudiste. Dy herë titullin e më të mirës në botë, atë të europianit dhe një tufë medaljesh tjera të rëndësishme. Kelmendi me këtë fitore do të futet në “Hall of Fame” të xhudos duke u bërë njëra nga xhudtistet e pakta që ka fituar gjithçka që fitohet në xhudo.

klankosova.tv