Lajmet e fundit
Moti në Kosovë gjatë kësaj jave do të jetë me diell por në viset malore do të ketë fjolla bore.
“Dita e hënë mbetet me kushte të njëjta meteorologjike, por nga e marta e tutje do të ketë fuqizim të masave ajrore me origjinë nga verilindja dhe veriperëndimi, kështu që përveç diellit, motin do ta karakterizojnë edhe vranësirat e dendura dhe të paqëndrueshme, ku vende-vende do të shoqërohen me riga lokale të shiut, kurse në perëndim në viset malore me lartësi mbidetare mbi 1500m reshjet e shiut do të shoqërohen edhe me fjolla të lehta bore, por që sasia e përgjithshme e reshjeve nuk parashihet të jetë e lartë”, shkruhet në komunikatën e dërguar nga Instituti Hidrometeorologjik i Kosovës.
“Kështu që vendi do të vazhdoj të mbetet me deficit të reshjeve. Temperaturat minimale gjatë këtyre pesë ditëve të parashikimit, parashihen të lëvizin ndërmjet -2 deri 5 gradë Celsius, ndërsa maksimalet e ditës parashihen të lëvizin ndërmjet 10-21gradë Celsius”.
“Shtypja atmosferike mbetet rreth vlerave të normales, por të martën do të pësojë rënie edhe nën vlerat e normales. Do të fryjë erë kryesisht nga veriperëndimi me shpejtësi 1-11m/s”, shkruhet në komunikatën e dërguar nga IHMK.
