"Kritikuesja me e madhe" e PDK-së bëhet pjesë e saj

Në vitin 2013 kur Ajnishahe Halimi i hyri garës për ta udhëhequr komunën e Skënderaj ishte pjesë e Lëvizjes Vetëvendosje. Ajo  pretendonte atë kohë postin e të parës së Skënderajt, komunë kjo e cila vazhdon të udhëhiqet nga Sami Lushtaku ish-komandanti i zonës së Drenicës në Ushtrinë Çlirimtare të Kosovës i cili ndodhet në burg. Madje pati thënë se elektorati ende nuk ishte emancipuar sa duhet që të mos bëjë dallime në baza gjinore të pretendentëve për pozitën e kryetarit. “Elektorati po vetëdijesohet dalëngadalë dhe tashmë kandidatet femra janë shumë më të pranueshme se sa që ishin disa vjet më parë”, kishte deklaruar asokoke ajo. Megjithatë Halimi nuk e fitoi garën për ta drejtuar Skënderajn, pasiqë mori vetëm 4,25% të votave ndërsa Lushtaku kishte fituar bindshëm me 81,74%. Halimi  vazhdimisht drejtoi akuza ndaj mënyrës sesi Lushtaku udhëhiqte me Skënderajn si dhe ndaj PDK-së se gjatë zgjedhjeve të fundit lokale ia vodhi edhe votat, njofton Klan Kosova. Por pas dy vitesh qëkur u mbajtën këto votime , ish-anëtarja e këtij subjekti politik  duket se ndryshoi tërësisht qasje ndaj partisë që e drejtoi për 16 vjet Hashim Thaçi. “Duke pasur parasysh punën e PDK-së e cila ka qenë pjesëmarrëse në të gjitha proceset kyçe të shtetit ne i jemi bashkuar kësaj partie” tha sot ajo gjatë një konference për media të mbajtur bashkë me kryetarin aktual të PDK-së, Kadri Veseli. Kush ishin “Fraksion+”? “Fraksioni +” që sot zyrtarisht aderoi në Partinë Demokratike të Kosovës përbëhej nga ish-anëtarë të Lëvizjes Vetëvendosje - Ajnishahe Halimi, Arben Gecaj dhe Fatos Aliu, të cilët ishin duke funksionuar që një vit. Të tre bashkë kishin themeluar “Fraksion+”, për të zbuluar shumë të pathëna për Lëvizjen Vetëvendosje deri atëherë. Kjo kishte ndodhur pasi në mars të 2015 Ajnishahe Halimi ishte shkarkuar nga pozita e koordinatores të Lëvizjes Vetëvendosje në Skënderaj. Atë kohë ishte shkarkuar edhe Arben Gecaj i cili ishte koordinator i LVV-së në pjesë perëndimore të Prishtinës. Nga kjo parti ishte larguar edhe Fatos Aliu (vëllai i Liburn Aliut, drejtor i urbanizimit në komunën e Prishtinës). Vetëvendosje pas këtyre shkarkimeve e largimeve kishte thënë se tre të larguarit nga ky subjekt kishin abuzuar me detyrat e besuara. Nuk kishin munguar as kundër akuzat nga Halimi e cila pati thënë se kjo lëvizje ishte kapur nga disa individë. “Është bërë kapja e Vetëvendosjes brenda disa individëve, është një kapje, një egocentrizëm i asaj i krejt kryesisë”, pati thënë Halimi në emisionin "Zona B" në Klan Kosova. Poashtu ish-anëtarja e këtij subjekti politik pati theksuar se  Vetëvendosje e kishte konsideruar atë gjithmonë si kundërshtare. “Ka qenë një moment i hidhur që ka ndodh për mua por ka qenë shumë i keq për ‘Vetëvendosjen’. E keqe për ‘Vetëvendosjen’ për arsye se nuk më kanë konsideruar se bashkëpunëtor por si kundërshtare”.

klankosova.tv