Krasniqi: Sulmi i djeshëm ndaj Klanit tregon gjendjen e shoqërisë karshi mediave

Gazetari Vullnet Krasniqi ka përgëzuar kameramanin Arben Restelica për mënyrën se si u përball me sulmin në Prelez të Ferizajt. Një burrë që dyshohet të jetë familjar i vajzës për të cilën u raportua dje se e ka privuar nga jeta foshnjën e saj në Emergjencën e Ferizajt ia mësyu vendin ku po xhironte Restelica dhe theu kamerën e televizionit me një shufër metalike. Ndonëse Krasniqi e kupton gjendjen e rëndë të familjarëve të vajzës, ai po ashtu merr parasysh edhe interesin publik për ngjarjen dhe natyrisht etikën e mbulimit të saj. “Nuk janë mediat fajtore pse rasti i çikës tanë apo familjares tanë është bërë kaq i madh, edhe pse rasti është kaq tragjik”, tha Krasniqi në Orën 7 të Klan Kosovës. “Ideja që me iu vërsul me shufër metalike një kameramani në krejt atë situatë, kallëzon më shumë për një gjendje të shoqnisë që e kemi karshi mediave”.