Krasniqi: Asnjëherë s’kam rrezikuar jetën e një njeriu, të timen po – besova që padrejtësia do thyhej

Ish-kryeparlamentari i Kosovës, Jakup Krasniqi po thotë fjalët e fundit në gjyqin e tij në Hagë. Ai tha se asnjëherë nuk ka rrezikuar jetën e askujt, përkundrazi të tijën po, transmeton Klankosova.tv. “Kjo më është bërë pa i shkaktuar padrejtësi askujt. Pa i rrezikuar asnjë njeriu të vetëm, përkundrazi kam rrezikuar jetën time, jo vetëm gjatë luftës çlirimtare, por që nga vitet 1972-73, së bashku me familjen time, me bashkëkombësit e mi, me bashkëfshatarët e mi, me besimin se errësira e padrejtësisë do të thyhej me agimin e shpresës. Kjo është arsyeja pse u angazhova për çlirim”, tha Krasniqi. Ai posçërisht theksoi kur doli pa maskë para ushtarëve të UÇK-së, si zëdhënës i kësaj ushtrie. “Nuk u shqetësova për sigurinë time, sepse më udhëhiqte përkushtimi im ndaj të gjithë qytetarëve”, tha Krasniqi.