" Kosova të përfitojë nga Italia në fushën e kulturës"

Ministri i Kulturës, Kujtim Shala, ka takuar sot ambasadorin e Italisë në Kosovë, Piero Cristoforo Sardi. Në takim u bisedua për marrëdhëniet e shkëlqyeshme mes Italisë dhe Kosovës në gjitha fushat dhe u shpreh nevoja që ato të intensifikohen me bashkëpunim të ndërsjellët kulturor. Ambasadori i Italisë, Piero Cristoforo Sardi, e falënderoi ministrin Shala për pritjen, dhe u shpreh se kjo vizitë bëhet në kuadër të vizitave njohëse me Institucionet e Kosovës, dhe shtoi se MKRS-ja është shumë e rëndësishme për një vend si Italia, që është një fuqi e madhe e kulturës. Ai më tej theksoi  se ndërmjet dy vendeve ka marrëdhënie të shkëlqyeshme në gjitha fushat, duke u shtuar se është në interes që në fushën e kulturës marrëdhëniet të avancohen në një nivel më të lartë. Shala me këtë rast tha se ministria që drejton ka iniciuar procedurat për nënshkrimin e Marrëveshjes së Bashkëpunimit Kulturor me Italinë, dhe ky akt do të jetë një hap shumë i rëndësishëm për thellimin e bashkëpunimit ndërmjet dy vendeve. Po ashtu, ministri i kulturës shtroi nevojën që Kosova të përfitojë nga Italia në fushën kulturës, të trashëgimisë kulturore, të restaurimit dhe të filarmonisë, sektorë këto të rëndësishme, ku përvoja e Italisë do të ishte tejet e dobishme, transmeton Klan Kosova.