Kopshtet 1 mijë e 600 vjeçare dhe antike të Turqisë akoma në përdorim

Kopshtet e Yedikule janë pjesë e historisë antike të Stambollit të cilat edhe ditët e sotme janë akoma në përdorim. Këto ferma urbane u kanë siguruar fruta dhe perime banorëve të qytetit gjatë gjithë periudhës Bizantine dhe Osmane. Perimet në kopshte rriten ngjitur me muret e Kostandinopojës, të cilat ishin ndërtuar nën Perandorin Theodosius II në shekullin e 5 pas Krishtit. Muret, janë shtuar në listën e trashëgimisë botërore të UNESCO-s në 1985. Dikur këto mure ishin pengesa e fundit për të mbrojtur qytetin, derisa sot kopshtet gati 1 mijë e 600 vjeçare përgjatë murit janë ende në përdorim, transmeton Klan Kosova. Dursun Kaplan, kreu i Shoqatës së Kopshtarëve Yedikule, ka qenë atje për një pjesë të vogël të historisë së kopshteve. Ai punon tokën për 27 vjet, punë kjo e trashëguar dhe pasuar nga babai dhe xhaxhai i tij. Zakonisht Kaplan produktet tij bimore i shet nëpër markete, mirëpo për shkak të bllokimeve në Stamboll ai i shet prodhime vetëm vizitorëve që vijnë për vizitë në kopsht ose njerëzit që blejnë përgjatë rrugës. Sipas tij sot janë gjithsej 32 kopshtarë, të cilët kultivojnë rreth 160 hektarë tokë. Një larmi e gjerë e perimeve rritet në kopshte në varësi të stinëve, por kopshtarët janë shumë më të zënë në verë sesa në dimër. Kjo pasi asnjë serë nuk është instaluar asnjëherë në kopshtet e Yedikule. "Këto janë mure historike. Ne duhet të mbrojmë gjithashtu muret. Nuk është e drejtë të ndërtojmë sera pranë tyre", thotë Kaplan. Megjithëse Kaplan e përshkruan veten si roje e vendit, ai përballet me shumë pasiguri për të ardhmen e tij në kopshte. Kjo tokë është në pronësi të komunës dhe kopshtarët paguajnë një tarifë për ta përdorur. Disa kopshte të Yedikule është dashur që të mbyllen për punimet e restaurimit në mur.