Konjufca në Mynih - vizita e parë si Ministër i Jashtëm

Ministri i ri i Punëve të Jashtme dhe Diasporës, Glauk Konjufca, vizitën e tij të parë jashtë vendit në këtë detyrë e pati në Mynih të Gjermanisë, si pjesëmarrës në forumin më të rëndësishëm botëror të sigurisë, siç është Konferenca e Sigurisë së Mynihut. Ai bashkë me kryeministrin Albin Kurti dhe ministrin e Mbrojtjes, Ejup Maqedoncin, shkëmbyen pikëpamje mbi nevojat për bashkëpunim të ngushtë me aleatët në përballje me sfidat rajonale dhe kontinentale të sigurisë. “Në rendin botëror që po riformësohet pjesëmarrja jonë në MSC, si qeveri e Kosovës, bashkë me Kryeministrin Kurti dhe Ministrin e Mbrojtjes Maqedonci, ishte mundësi e shkëlqyer për të shkëmbyer pikëpamje mbi nevojat për bashkëpunim gjithnjë e më të ngushtë me aleatët në përballje me sfidat rajonale dhe kontinentale të sigurisë”, ka shkruar Konjufca në Facebook. Ndër të tjera, ai tha se forcimi i Kosovës si pjesë e Aleancës Perëndimore, sikurse edhe i çdo aleati veç e veç, do ta bëj aleancën veri-atlantike më të fuqishme kundrejt sfidave në këtë shekull të riformësimit gjeopolitik./Klankosova.tv